من أجمل قصائد الشاعر / عبدالله السميري [ من منطلق صح و خطأ و مبدأ تبي روح و تعال ]
--------------------------------------------------------------------------------
من منطلق صح و خطأ و مبدأ تبـي روح و تعـال
و مـن زآويـة طنـش تعيـش أيآمهـا و ليالهـا
يا ابن نجـم مـا للحمـول الكايـدات إلا الجمـال
ود الحمـول الكايـدة يـا ابـن نجـم تشتالـهـا
آرث على عد الروى و اعنز علـى صـم الجبـال
مالـي و مـال قصارهـا مالـي و مـال طوالهـا
اذا انخفض وزن الذهب و إلا رخص سعر الريـال
يـآ كثـر نـآس لا نعبرهـا و لا نلـجـا لـهـا
بس انت اعدك في الشدايد درع جمب و راس مال
لأنـك ولـد غالـب دروب المرجلـة و رجآلـهـا
على العموم الوضـع عـادي بيننـا و الشـك زال
بعض السوالف عنـك تكـرم لحيتـي و إسبالهـا
و أنا على فكرة من أمس يدور فـي بالـي سـؤال
ليش الرجال أصبح تفاخرهـا بـروس أموالهـا !؟
و حكآمنا الستة كفو في كـل وقـت و كـل حـال
وشعوبنـا جهالهـا فــي منـزلـة عقآلـهـا !
لا قـدر محمـد ولـد زآيـد إليـا جالـه مـجـال
تدعي لـه أم(ن) مـآ درت بإنـه كفيـل أطفالهـا
شخصيته عنها يطـول الشـرح و يـزول الجـدال
محمد أعجوبـة .. و زآيـد معجـزة بلحالهـا !!
بالمختصر شـي يقـال و شـي و الله مـا يقـال
لكـن عـلـى الله اتـكـل و يحلـهـا حلالـهـا
يعيش جمهور النصر و يعيـش جمهـور الهـلال
حتى لو الكـورة مـا هـي منـا و لا حنـا لهـا
أحسن من نروح سويسرا و إلا نـروح البرتغـال
و إلا نسيـر لديـرة البنـغـال مــع بنغآلـهـا
الشرق الأوسط في خطر و الغرب وضعه عال عال
و القدس له خمسين عآم و حآلتـه يرثـى لهـا !
و بغـداد مسـرح للدمـار و الجريمـة و القتـآل
عسى الله من الاعداء يحررهـا و يصلـح حالهـا
و اللـي يحبـون الحـرام و لا يحبـون الحـلال
حسيبهم مـن يجـزي الحسنـى بعشـر أمثالهـا
لو من يقول يطول قالـوا قبـل ينـام قـال طـال
لكـن هـذي غلطـة الشـآطـر و ذي موآلـهـا
و ميزات عصر العولمة تساوى البنات مع العيـال
مآ نقـص حقـوق الولـد و البنـت ريـح بآلهـا
كنا بعصر العولمة و صرنـا بعصـر افتـح مجـال
مآبـاقـي إلا يشـاركـه فــال الله و لا فالـهـا
و ليه ضغطي مرتفع ؟ و انـا سريـع الانفعـال ؟
من كثر ما شافت عيونـي شـي مـا يحلـى لهـا
كيف انبسط و اضحك و انا ضايق صدر مشغول بال
و أبسط حقوقي دلتي ما غيـر ينشـرب فنجالهـا
و الشعر ديـوآن العـرب منـذ القـدم و لا يـزال
يحكي عن امة عـن مسيرتهـا و مجـد أبطآلهـا
فعلا يا لجنـة شاعـر المليـون ميـزآن العـدال
النآس مـا تحكـم عليهـا أصوآتهـا و أشكالهـا
و إن كآنها في الشعر انا في الشعر ما عندي إشكال
اسمـع بحـورك كلهـا مـن جآلـهـا لجآلـهـا
إما كتبتـه مـن عقـل و إلا كتبتـه مـن هبـال
هـذي ترانـي عمهـا و هـذي ترآنـي خآلـهـا
و أنـا ادري انـي مآنـي بكآمـل فـلله الكمـال
لكـن شآعـر ! و أتخيـر فـي البيـوت جزآلهـا
يالعيطموس يآلفاتنة يـآ أم الدلـع يـآ أم الـدلال
النـآر مـن شبابهـآ و الخيـل مــن خيآلـهـأ
يآ سارقة عين الصقر يـا سارقـة عنـق الغـزال
يآ سآرقـة كـل الوصـوف , دقاقهـا و إجلالهـا
يآ دآرين قولي للجنة شاعر المليون عبـدالله قـال
الله يجـمـل حآلـهـا و الله يطـيـب فآلـهـأ !
ومن قصائده ( قصيده جنيف )
العام قررت اسافر عطلت الصيف .. اصعب قرار اتخذته في حياتي
ماشلت هم الاقامه والمصاريف .. اشيل هم اليال المقبلاتي
فوجيت باهل الخليج هناك بجنيف .. غير الكويتي سعودي واماراتي
غير العذارا حسينات التواصيف .. ست ويشن فري العيال مع البناتي
وعلى بحيرة جنيف وشاطي السيف .. تجمع الناس من كل الجهاتي
هبي فلانتايم وعيد المواليف .. كلن يرجع شريط الذكرياتي
جوا رومنسي لاحر ولاعواصيف .. متوفره فيه كل المغرياتي
اخوان بدوا رعاة الشاة في الريف .. اهناك باشات حتى في الغاتي
كم واحدن صاير معزب وهو ظيف .. يدفع حساب العشا والطاولاتي
وكم واحدن بالمهايط والسواليف .. مدمن حكي نسال الله الثباتي
وكم واحدن قال انا بالرمح والسيف .. ماحسب لاعنتر ولاحسب لازناتي
واحد له اسمين مستر جوي ومنيف .. ضايع وله معجبين ومعجباتي
اليوم يقظيه مع مومو ومع طيف .. واليل يسريه كله مايباتي
قلت اتلقف واصير من الملاقيف .. واقول ياسيداتي ياانساتي
اين النقاب الخليجي والنفانيف .. واين العبايات واحجاب الصلاتي
ظعتن ورا القبعه والجنز والميف .. واحلا العطورات واغلا الماركاتي
قالن كلام العرب كذب وتخاريف .. اهل الجهل والتخلف والشماتي
الغرب بالعلم في روس المشاريف .. وعريبيا في مكانك سير وتحاتي
قلت الخلاصه لابوكم لابو جنيف .. قد باي معكم حرام اضيع اوقاتي
موضوع: ،،من منطلق صح وخطأ وجنيف ،، 
السبت يونيو 14 2008, 03:00
